長實（1113）及港鐵（066）合作發展的將軍澳日出康城Sea to Sky，有出席揀樓的準買家陳生就在簽臨約前一刻離場，陳先生表示，透過中原地產入票認購長實將軍澳日出康城Sea to Sky一個單位，「行規有所謂『回佣』，咁就同中原地經紀傾。事實上我喺其他代理行都有offer，咁我就問佢哋會offer到幾多，結果就接受。」陳生提供一份與中原地產經紀簽訂的文件，題為「置業禮券」，內文列明：「本公司現承諾向台端送贈置業禮券，金額為佣金的95%」，再於佣金下補註「樓價的3.25%或發展商所提供之佣金（需提供證明）」，該文件有相關區域營業經理的簽名。他表示，目標單位是3房間隔，折實後約1,130萬元，若按此計算，佣金為樓價3.25%，即約36.7萬元，回佣95%，即涉及金額約35萬元。

陳先生到售樓處，他憶述：「準備簽臨約時，中原地產就反口啦。」他意指，原本已與中原地產簽訂回佣文件，結果在簽臨約前一刻反口。他稱：「我哋覺得，理論上簽咗回佣紙，無得反口。但去到簽臨約前，就話回唔到佣，中原地產經紀就同我講，如果我哋堅持要回佣，就唔做我哋生意，我哋當時好愕然，傾咗一輪，佢哋有唔同老闆級人馬，包括區域經理、分行經理等等。但都唔係同我哋傾嘅，一係就接受回唔到佣，一係就唔好買囉。於是我問發展商可唔可以換代理，點知發展商話唔得。咁我哋覺得中原地產唔可信，後來無辦法，我咪唔買囉。」結果原本抽到前籌可揀心儀3房單位的他決定離場。他續稱：「當初梗係有回佣offer先同佢哋入票去買。最後無買到，因為信佢哋唔過，驚又唔知出啲咩。今次我哋就無金錢上損失，但希望小市民唔好俾經紀回佣嘅手法𠱁你落沓，唔想大家真係有損失，或者有不愉快經歷。」